Pecados é un ciclo de músicas prohibidas organizado dende o Pazo da
Cultura de Pontevedra que se vai desenvolver entre os meses de outubro
e decembro. Toumani Diabaté, Stereolab e The Residents van ser os
protagonistas no cartel, que hoxe presentou aos medios a concelleira de
Cultura da cidade, Lola Dopico, pero a programación comeza xa, esta
mesma semana, con varias actividades de presentación, todas de balde: a
actuación do Dúo Dithyrambe, un espectáculo único que vai percorrer
algunhas prazas da cidade vella en varios momentos do día, e o
intercambio de cedés, unha intervención no mercado discográfico local.
As entradas para cada un dos concertos pódense adquirir por anticipado
en www.caixanova.es (12 euros) ou na propia billeiteira do Pazo da
Cultura (15 euros) no propio día da actuación. Tamén se pode mercar un
abono para todo o ciclo, ao prezo de 30 euros, no mesmo enderezo web.
Deseguido detallamos todas estas citas coa música prohibida deste
outono na cidade de Pontevedra:
1 e 2 de outubro Dúo Dithyrambe
Casa das Campás / Praza da Peregrina / Praza da Ferrería / Praza da Verdura, 12, 19 e 21 horas
Coma anxos caídos, logo de 257 anos e tres meses conxeladas nalgún
recanto perdido nos Alpes, Madame Bérénice de la Trouffinière e Madame
Culnégonde de la Garde Montée acordan de súpeto no cambio de milenio
arrodeadas de sonoridades populares contemporáneas, do punk ao disco ou
o hard rock. Fascinadas, estas discípulas de Bach adaptan todo o que
lles gorenta ao seu rexistro lírico do século XVIII e empezan a
percorrer rúas, prazas, teatros e cafés do mundo enteiro co seu ukelele
apropiándose dos Clash, de Abba ou dos ACDC. Se os Sex Pistols fixeran
ópera, soarían coma elas. Únicas.
12 de outubro Toumani Diabaté
Pazo da Cultura, 21 horas
A kora, unha variante da arpa procedente da África Occidental, ten
vinte e unha cordas. Poden parecer moitas, pero a Toumani Diabaté
sóbranlle dentes para tocala. Nacido nos anos sesenta en Bamako (Mali),
fillo do músico Sidiki Diabaté e descendente dunha longa liñaxe de
intérpretes, máis de setenta antes ca el, é hoxe un dos maiores
virtuosos da kora. Rebelde e heterodoxo, é porén o mellor embaixador da
tradición musical do seu país. Coma os griots das tribos africanas,
antigos contadores de historias que tecían a comunidade coa palabra,
Toumani armou na Symmetric Orchestra unha ferramenta para furar
fronteiras. Co seu último disco, The Mande Variations, estrea nova formación.
21 de novembro Stereolab
Pazo da Cultura, 21 horas
Entre a ourivaría pop e a experimentación, a medio camiño entre o
savoir faire e a pescuda de novos riscos, a banda británica Stereolab
leva máis de quince anos incomodamente instalada na vangarda, a
arrandear con lucidez entre o krautrock, a bossa e o lounge. O recente Chemical Chords
(2008), primeiro álbum en catro anos e undécimo na súa prolífica
carreira, colócaos de novo no lugar que acadaran con títulos tan
emblemáticos da música popular contemporánea como o Emperor Tomato Ketchup que publicaran en 1996. Un tratado sobre o ritmo con final feliz. Un retorno agardado.
9 de decembro The Residents
Pazo da Cultura, 21 horas
Están aquí porque nunca se foran. Son aínda un colectivo de músicos
e videocreadores anónimos porque o seu programa ideolóxico non mudou
unha coma dende The Third Reich'n'Roll (1996). Talvez por iso,
The Residents seguen a cuestionar o pop como artefacto do mercado
cultural contemporáneo. Agora atacan de novo con The Bunny Boy,
un álbum, un personaxe, unha serie saída da internet, unha coartada
conceptual e unha posta en escena que nin é música ao vivo nin é teatro
nin é videoarte. Sesenta discos máis tarde, The Residents seguen aí.
Esta é a súa primera xira mundial en anos.
RSS feed Comments
